الثلاثاء، 9 سبتمبر 2014

طوفان خلاص


 #صورة_تحكي




مر يوم أو يومان لكن المشهد مازال يعبر أمامى بين لحظة و أخرى.

المشهد" فيديو على فيس بوك" :

شخص ما  يحاول سحب كلب من ذيله والكلب بلا مقاومه تذكر .. اللهم إلا محاولات الإفلات...يتم سحب الكلب الى حافة سطح منزل ورميه من ارتفاع ربما طابقين أو طابق ... يسقط الكلب بلا حراك.

انتهى المشهد.!!

تعليق:

الموقف مستفز جدا وكلما تذكرته اقشعر بدنى عند محاوله تخيل مدى الألم.

المستفز اكثر انه هناك فيديو لهذا الموقف..على أساس أن ذلك الفعل مدعاة  للتفاخر.

الغريب أن الكلب لم يقاوم مقاومة تليق بالحفاظ على حياته!!


ذلك الموقف أصبح الشىء الرسمى والمتعارف عليه فى التعامل بين بنى أدم .

...الطغيان سيد الموقف.

الافتراس على حسب علمى صفه حيوانيه تصدر من حيوان

الافتراس أصبح  شامل الكوكب وبشكل تبادلى

من قال انه على هذه الارض ما يستحق الحياه؟

على هذه الارض كائنات تستحق الاباده....  كانت تسمى قديما بنى أدم

عندما رأيت فيلم نوح كان يصور لك أن سبب الطوفان ان الناس اختلفت وحادت عما كانت عليه فى الارض ونسيت وجود الله  فكان الطوفان حتمى  

اعتقد اننا فى ظل الموجود نحتاج طوفان نوح  طوفان الخلاص ..يخلص الكوكب من البؤس المصاحب لوجود بنى ادم

ومن دلالات التوحش ونتائجه
.اصبح من الطبيعى انك ترى الغنى والفقر فى نفس المكان وفى نفس الشارع
.هم فى الاصل مكملين لبعض

لكن ف الواقع احدهم مهضوم لصالح الاخر
احدهم ينمو بشكل طفيلى على الأخر حتى يقضى عليه.
لم تعد انسانيه
ان لم تكن مفترس .. فأنت ولا شك ضحيه لافتراس قادم

ولكن أغلب من أعرف لايجيد دور الافتراس للأسف.











الخميس، 4 أبريل 2013

مواقف من الصبا -بتعملوا فينا كده ليه يا اخوانا ده احنا بنحب مصر :D



قبل ما تقرأ اى حاجه 

هذا الكلام مجرد هرى فاضى مالوش اى تلاتين لازمه ..
والتحذير ده حفاظااع الصحه النفسيه


احم احم 

من الحاجات ال كانت ف دمنا ..ولازالت يعنى حب الوطن

زمان بقى كان عندنا مفهوم واشياء متعارف عليها منها مثلا  ان الشرطه المدرسيه  أولا انك تبقى من الاربع عيال بتوع تحيه العالم دى اعلى مراتب الشرف 
لدرجه ان الواحد كان مفكر ان ال يبقى ف الشرطه المدرسيه او ف الاربع عيال بتوع تحيه العالم كأنه بالظبط أحمد عبدالعزيز ف المال والبنون لما كان بيزعق ويقول عباس الضو بيقول لا ..واتنفخ ولا قالش اى حاجه..ومعترفش ان الدبله مع شريف منير  ال اتضح انه  وائل نور بس متخفى ف الجزء التانى :D

اييييييه أيام 

المهم .كان كل الطلبه بتحاول تدخل ف الشرطه المدرسيه او فريق تحيه العلم ده( الشرطه من يومها طموح مافيش كلام :D ) ..وياعينى بيحاولوا بكافة الطرق..من لم و رق ف الحوش لكنس فصل ..لعمل اى مشوار للمدرس ...ان شاء الله حتى الظروف تجبرنا اننا نحفظ جدول الضرب او واجب الدين ...المهم نوصل للهدف..للقمه..(انت من الاحرار يا على !!)

المهم  مقدرتش اوصل للشرطه المدرسيه للاسف ..لانه مش معايا واسطه .يعنى لا والدتى اداريه ف المدرسه ولا مدرسه من المدرسات  ولا اى حاجه ولا واد نصاب اعرف اضحك ع الدقون 
.زى بردو لما كبرت مدخلتش ثانوى جوى علشان مافيش واسطه :D
بس قدرت وبعد قصه كفاح انى اوصل لفريق تحيه العلم .

كان بييكون واحد ف المقدمه كده ووراه تلاته 
الاول ده كان بيقول شويه كلام كده مش فاكر منهم غير اخر تلات كلمات .ال هما 

ف حيوا جميعا هذا العالم ال........ ..بنفس مليئه بحب الله والوطن

الكلمتين دول وخصوصا بنفس مليئه بحب الله والوطن ..كانوا بيخلونى أسمع موسيقى رأفت الهجان ف ودانى وانا واقف ..واتخشب واشد نفسى وبأعلى صوتى أردد تحيه العلم 

والتلاته ال وراه دول بقى بعد لما الولد ال قدام يخلص..ال وراه ع طول من التلاته ..بيقول الله اكبر تلات مرات ...وتحيا جمهوريه مصر العربيه تلات مرات 

اختارونى بقى علشان اقوم بالدور الاخير ده

ولانى كنت فعلا  مش بمثل ..ف حب الوطن والنشيد وتحيه العلم 

 ف لما وقفت ف المكان ده ..اتسمرت ...والمشهد أخدنى ..واندمجت ف الدور ..والعلم قدامى والكلام ف دوانى ..خلانى افتكر كل افلام المخابرات ...ومسلسلات الجاسوسيه ..لدرجه انى لما المفروض اتكلم ..منطقتش ...وفضلت واقف ابص للعلم .


ايييييييه ..كانت ايام 

يقال بقى ان العيال ال جمبى ال انا مش فاكر هما مين ...زهقوا يدوسوا ع رجلى او يخبطونى بايديهم من غير ما الاستاذ ياخد باله 

الغريب من مش فاكر اى حاجه

حتى لما المدرس قال ساكت ليه يا ............................. ...مسمعتش بردو ..بس هما قالولى

مش فاكر غير ان ف ايد سحبتنى من قفايا وقالت لى ع فصلك اجرى  يا .............تيت  :D

ههههههههههههههههههههههههههههههههههه

المشكله بردو انى مكرهتش تحيه العلم ..ولا كرهت النشيد ..فضلت احبهم بردو :D



الأربعاء، 13 مارس 2013

رساله بلا عنوان ...هل تصل؟!


احم
اممممممم
توقفت عن التدوين ...أو ربما توقف عنى
والسؤال هنا ...لماذا توقفت عن التدوين ؟!!
أرهقني التفكير ,,,,أو ربما توهمت ذلك,,,
ف كثيرا ما نختلق أعذار لأشياء ..,,,فقط ..كي ننساها
ولماذا التفكير؟!!
ثمة أشياء كثيره توقفنا عنها ..ليس التدوين فقط,,,,
ربما يمكننا اضافه الى قائمة الاشياء قيد التوقف ,,القراءة بنفس النشاط  السابق ,,, الرياضة ,,,, الكلام !!! ....ومجازا نقول الحياه!!
هناك انواع كثيره من الشقاء...أكثرها شقاء ,,,,أن تحرم مما تحب ,,,شخص كان ,,شيء,,,كتاب,,هواية,,
سر الشقاء فى الحرمان
وسر عدم تقديرنا لما بين ايدينا يكمن فى  توفر الشىء..او الشخص
أى يمكنننا القول أن سر الشعور بأهمية اى,,شخص,,,شىء ..فى الحرمان منه ولو لفتره
حقيقة تدهشني  أهميه الحرمان فى حياتنا ..على الرغم من بغض الكثيرين له

أحب من الاشخاص أنتٍ...ولكن لم أعد أدرى ....أأحبك حقا....أم لأنى حرمت منك!!!

أصحو فى منتصف الليل على حلم مفزع.
أفكر فى خطورة توقفي عن أشياء كثيره
أفتح (النوت بوك الخاص بى) ألقى نظره سريعة على لاشىء
أسمع درويش في احدى روائعه (الجميلات)
عند قوله ( الجميلات هنَّ القريباتُ) أتذكر مدى بعدك
أكتب اليكى
وأنام
عسى أراكي ولو بشكل عابر في أحلامي


الثلاثاء، 25 ديسمبر 2012

الفقراء اولا

الفقراء اولا
ذلك  اليوم الذى أقوم بزياره القاهره ..
أقابل وشوش لا حصر لها ..فى الشوارع والمترو
للاسف ..أغلبها  حزينه.
عيون مليانه هم.
الصحه مش تمام
الفقر ناحت بصمته على كل الملامح

الفقراء اولا

زوج شاب وزوجته...
طفل لا يتجاوز الخمس سنوات
حزن مغيم ع الرؤس..دمع متحجر فى العيون..
فقر واضح فى ملابسهم..الى درجه ان ما يرتديه الطفل فى قدمه ممزق...
حتى الطفل!!
حرم من البهجه..متمثله ف حذاء!!
حتى الحذاء

الفقراء اولا

عجوز متهالك يمشى على مهل..
يحتاج من يساعده فى المشى
يحتاج من يساعده فى صعود او نزول درجات سلم !!
ومازال يعمل من اجل فتات !!

الفقراء اولا

سارحين فى الهموم ..هائمين فى اللاشىء


الفقراء اولا


خالد ناجى

الاثنين، 22 أكتوبر 2012

صندوق ورق ..كتاب جديد عن دار ليلى

بسم الله الرحمن الرحيم


الكتاب الخامس ليا ...


قريبا جدا خامس كتاب اشارك فيه ...وتانى كتاب ورقى اشارك فيه


الجديد ف الكتاب ده ..انه انا المسؤل عنه :)


الكتاب يصدر عن دار ليلى ان شاء الله


ويحتوى على نخبه من ابداعات اقلام عديده


دى صفحة الكتاب على الفيس بوك


https://www.facebook.com/KtabSndwqWrq


ودى صفحته ع الجود ريدز


http://www.goodreads.com/book/show/16095676




كتاب صندوق ورق ,,,,يكتب فيه حوالى 50 كاتب,,,يتشاركون ابداعهم الخاص .....يصدر عن دار ليلى



المشاركون فى الابداع


رامى يوسف -
محمد غاليه -
باسنت خطاب -
محمد جمال عبدالغنى -
أيات مختار -
نهى الماجد -
أحمد عبد العزيز عبدالرحمن -
حوريه محمد-
مصطفى سيف -
محمد أحمد الناغى -
لبنى السحار-
أسماء عفيفى كشكاش -
إيمان زيتون -
أحمد موسى عبدالمطلب -
نيفين كمال -
نيللى عادل -
رضوى صلاح مهران -
محمد جمال محب -
خالد ناجى -
فاطمه عبدالله-
شيرين سامى-
أحمد يوسف شاهين -
هدير عرفه -
دعاء محيسن-
شيرين عبدالله-
رضوى أشرف-
محمد الوكيل-
محب جميل-
جمال منصور-
محمد إمام-
رحاب صالح-
ريهام سعيد-
شذى وحيد-
سميحه الصواف-
دينا ممدوح-
كريم هشام-
شروق إلهامى-
غاده محسن-
نهال حمدى-
نهى صالح-
دعاء سلطان-
لبنى غانم-
ساره درويش-
مها قدرى -
آية محمد حماد-
مروه الاتربى-
نورهان مدحت-
مريم بدر-
ندى يسرى