الاثنين، 16 مايو، 2011

قميص!!! بنطلون!!!.البطيخه جابت جووووون





اممم ..انا كنت جى  هنا ليه ؟؟...ايه الهسس  ال انا فيه ده..ايوون ..نقول بقى ..ازيكوا يا حلوين ..كبار وصغيرين..تخان ورفيعين..طوال وقصيرين...مسلمين ومسيحين..اجانب..ومصريين...حلوين ومش حلوين..طيبين وشريرين.صاحين و نايمين ..مركزين وتايهين..فاهمين ومش فاهمين..فلول و للثوره منضمين..
وكل ال انا مش فاكرهم ياريت متكونش زعلانين ..نبدأ ونقول بسم الله الرحمن الرحيم

زى كل اول شهر .ماسك ورقه الميزانيه وعمال احط المصروفات والايرادات ..محاسب بقى وكده ولازم الاول اشوف هصرف ازاى ف الشهر ده وهيحصل ايه معايا ..وكالعاده كن تمتوقع انه ف النهايه لازم يبقى ف عجز ف الميزانيه اشمعنى انا يعنى ما البلد دايما عندها عجز ميزانيه
المهم حصل مفاجأه غريبه ومبتحصلش كتير..تفتكروا ايه ؟ ايوه صح ..شطور يا اللى هناك ..هجبلك حاجه حلوه ....طلع ف فائض..انا فرحت جدا ..الفائض ده  كان المفروض انزله ف الجرايد الرسميه صفحه اولى...اه امال ايه ..هيا دى حاجه بتحصل ف العمر كام مره ..خلصت فرحتى وخلصت الميزانيه ولميت الورق وحسبت الفائض كام ..وبدأت رحله البحث عن الكنز..قصدى رحله البحث عن طريقه التصرف المثلى ف هذا الفائض  الغزيررررر..ال كله اول عن اخر150جنيه...وفضلت ابحث ابحث ابحث..واستعنت بكل السبل المتاحه ..من خرائط ومراكز بحث والعم جوجل وعملت استفتاءات للمساعده وتصويت  واخيرا قولت اعمل مسابقه ف التليفزيون ....وعملت مسابقه  وكان  السؤال لو انت مكانى  تختار ايه

تشترى بنطلون..تشترى قميص..تعمل زى الناس الحلوه وتدخر !!!

للاجابه اتصل فورا تاخد ال150جنيه

وطبعا محدش سأل فيا

فقررت بقى استخدم ذكائى .واضع الحلول المتاحه واستخدم طريقه التفكير المنطقيه من عرض لكل حل والنتائج المترتبه عليه ودواعى استخدامه .ونظريه المهم فالاهم وهكذا..المهم
 ظهر امامى حل اخر ..لانى فجأه افتكرت انى مش بقرأ من زمان اوى ودماغى بقت زى البطيخه ..وهنا الحسبه اتقلبت والمسايقه باظت
يعنى قميص او بنطلون او نرضى البطيخه  قصدى دماغى بكام كتاب ..امممم

و ازادت حيترتى ..اممم ..بوووف..عااااا


واخيرا

وصلت لحل طالما الحسبه صعبه
انا هدخر  وابقى شطور واحط الفلوس ف الحصاله
وف يوم من الايام

ال هوه من زمان

مش من زمان اوى
امبارح

راكب الميكروباص ف امان الله ..فجاه اعدى من ع المعرض ال ف قصر الثقافه..تييييييييييييت

ع جمب يا اسطى

ونزلت ودخلت المعرض....واحسست بحركه غربيه ف جيبى ..وصرخه رعب

عرفت فورا انها ال150جنيه ...لا تريد فراقى

ولكنى لما التفت الى ندائاتها وتوسلاتها انها لا تريد الخروج الى دنيا المرمطه والحر وانها تنعم بالدف والامان ف جيبى

ولكن هيهات

انسى يافوزيه

قميص!!! بنطلون!!!.البطيخه جابت جووووون


وفازت البطيخه..احم احم  قصدى دماغى
***********
******
****

دخل وسط الكتب..احساس جميل اوووى كتب كتيير وانت ف الوسط..طبعا كتب المعرض كان شكلها  غير مطلوب ابدا..واسمائها غريبه .مما يطظرنى انى استرى كتب من ع الرفوف ال هيا اصلا بنفس السعر ده بره بس اهو  كتر خيرهم انهم جمعوها هنا

لفيت لفه كده ع السريع علشان الشغل وقررت انى اشترى

وكانت القائمه كالتالى 

فاروق جوديده
_____________
هذه بلادى لم تعد ك بلادى
اعاتب فيك عمرى

صلاح جاهين
_____________
رباعيات صلاح جاهين
الاعمال الكامله لصلاح جاهين

بلال فضل
_____________
ضحك مجروح


paulo coelho
_____________

brida(مقلتهاش مترجمه قولت ادوس انجليزى)

احمد خالد توفيق
_______________
يوتوبيا

بهاء طاهر
_______________
نقطه النور
الحب ف زمن المنفى


جمعت الكتب ورحت ادفع ..وياريتنى ما رحت...طلعت التكلفه اعلى من ال المفروض يتصرف..نيهاهاهاهاها ..دى كانت ضحكه ال150جنيه وهيا شمتانه فيا

طلعت ال191 جنيه ال الراجل طلبهم وانا راضى تماما..لانى  مقتنع ب ال انا شاريه ..بس طبعا مش عارف هعمل ايه ف عجز الميزانيه ال حصل دلوقتى ده

طبعا الكتب دى موجوده بى دى اف ع النت ..بس انا مبحبش للاسف اقرا من الكمبيوتر ..لازم امسك الكتاب ف ايدى ..تقليدى بقى نقول ايه

اخدت الكتب ..وخرجت راكضا ..لان احلام مستغانمي  كانت تنادينى باكثر من كتاب...امممممممم


لا لا لا

انزلى من ع ودنى يا احلام

***********************************
***************
*****

كنت بعيد عن المكان ال انا رايح له ..وبما ان قصر الثقافه جمب الكورنيش

قولت زى الفل انا من زمان مش مشيت عليه .من ايام الجامعه تقريبا..نزلت ع طوووول ورحت مشيت ف الهوا  واخترت مكان بحب اقعد فيه ..وطلعت فوق السور وقعدت..ونظرت للمياه ...ورحت ف عالم اخر .. حاجه غريبه جدا ..انك لما تقعد  قدام المياه فعلا وف الهوا بتنسى كل حاجه ..جميل اوى الجو ده..فضلت افتكر جميع الذكريات الجميله ..وقفز الى ذهنى سؤال..ياترى فين الذكريات الكئيبه دلوقتى؟؟!!!!! اكيد بتموت من الغيظ وبتحاول تنط قدامى..بس ع مين ..الذكريات الجميله طابقه ع نفسها ومش هتديها فرصه..وفجأه تملكتنى رغبه فظيعه ان اقفز ف النيل ...ولكن طبعا ولانكوا اكيد عارفين
انى سباح قديم وماهر ومش بعرف اعوم الا ف المحيطات وما اوسع منها ...فلو نزلت ف النيل الصغير ده اكيد هغرق..وتبقى مشكله طبعا لما سباح ماهر يغرق ف شبر مياه زى ده..وهيبقى ايه شكل مصر  وقتها قدام الدول الاخرى لما يعرفوا ان سباح ماااااهر ..وماازلت اؤكد ع كلمه ماااهر .يغرق ف شبر مياه ...وبالتالى ..وعلشان خاطر مصر ...قولت بلاش انزل  النيل
وفى لفته من لفتاتى ...صعقت لما اره ..ايه الناس دى كلها وكانوا فين وجم منين ؟؟؟
ماشاء الله كل واحد ومعاه حبيته او خطيبته او ال اعلم ..المهم ان الدنيا مليانه اجواز اجواز اجواز...ايه ده ؟؟مفيش شويه فل و لا ورد ..كان الواحد عمل قرشين زى الفل ..اهو نعوض العجز ف الميزانيه
وتنبهت لحقيقه مرعبه ..جعلتنى انزل من ع السور ..واجرى من المكان


الحقيقه هى
 انه بما ان العصافير كلها اجواااااز

يبقى اكيد انا



.
.
.
.
.
.

الغراب الوحيد ف المنطقه
***************************************
***************
*****
***

ملحوظه1:كلمه السر فيس بوك..اى حد يحصله مشكله يفتح الفيس ويحط كومنت بالمشكله ..ويقولى ايه النتيجه

ملحوظه2 :امبارح عملت سبع رجاله ف بعض وقولت اوقف الدوا من غير ما الدكتور يقولى ..والنتيجه انى اكتشتف انى لسه تعبان من ال حصل لى ..متعملش 7 رجاله تانى ومتوقفش الدوا الا لو الدكتور قالك وقفه
ملحوظه3:لاحظت ان معظم ال ع الفيس بوك ..او ال اعرفهم ع الاقل كانوا ف قصه حب وفشلت..ومجروحين...!!!! طيب لما المجروحين ع الفيس بوك..امال ال بيجرحوا بيروحوا فين ؟؟؟؟!!!
     ملحوظه4: انا باكل ايس كريم دلوقتى..مين عاوز؟؟؟!!!!


وصلنا للنهايه
اشكركم ع المتابعه..ولقاء يتجدد ان قدر لنا الله ذلك