الثلاثاء، 26 يوليو 2011

لا دقنى اتحلقت..ولا مصر اتحررت

امبارح كانت المواصلات زحمه جدااا..مواصلات ايه ؟!! لا ده لم يكن لها وجود من الاساس..وصلت البيت متأخر جداااااااااا
ويادوب وصلت ..راحت الكهرباء مقطوعه ..منك لله ياللى ف بالى ..
فضلت ادور ع شمعه وكبريت...ولعت الشمعه بالكبريت..رميت الكبريت..ومعايا الشمعه ..جهزت الاكل ...قعدت اكلت..وبسمى وداخل ..النور اهوه جه...هفففف...شطور انا طبعا ..طفيت الشمعه....بخ...قطع النور....ياشطور....فقمت تانى ...اشوف كبريت....وجبت الشمعه...جمب الكبريت..ولعت الشمعه..نورت الشمعه...دخلت انا جرى...اكمل اكل
...............
.......
خلصت اكل ...وقعدت الف حوالين نفسى ف البيت..مش لاقى حاجه اعملها ..الجو حر ومفيش نور ..شويه وجه النور تانى ...قولت افتح الكمبيوتر اشوف الاخبار..فتحت قريت خبر عن وفاه شهيده اخرى نتيجه احداث الثوره

امممممممم
اااااااااااااه
ااووووووووووووووف
انا لله وانا اليه راجعون

شهيده اخرى ..قتلت بيد بارده..واهم شىء ان اخوها كان قد تم قتله ايضا وقت الثوره...بصيت ف سقف الاوضه...ودار ف بالى سؤال ..هوه ايه  شعور اهل الولد والبنت ..يااااااه ده مجرد التفكير بس ف هذا الاحساس بيوجع جدا.

ربنا ما يكتبها ع حد تانى

قطع النور


قطع النور تانى ف بيتنا...بس هوه فعلا مقطوع من بعد الثوره ف مصر..


.يا مجلس يا عسكرى ...هوه النور هيجى امتى تانى؟؟

روحت ع السرير..مش عارف نمت امتى ...بس حلمت حلم غريب فكرنى بحال مصر

حلمت بأنى عاوز احلق دقنى...وواقف ع مكان عالى وله سورررر طووويل...ومجهز كل حاجه علشان احلق..وكل ما احط المعجون ع دقنى...تحصل حاجه ورايا...اروح اشوف اللى بيحصل

ارجع اكمل حلاقه ..الاقى المعجون مش موجود...نشف يعنى..ارجع احط المعجون..ومره تانيه يحصل حاجه ترجعنى ..اروح اشوف الحاجه..الاقى المعجون نشف..مره تانيه الاقى الفرشاه مش موجوده

فضلت طول الليل احلم بنفس الحلم ده..ومع انى قلقت كتير لان الجو حر..الا انى كل ما انام احلم بنفس الحلم..لغايه ما صحيت الصبح ع انى واقع من فوق السرير

ياترى يا مصر هتفضلى تضيعى المعجون والفرشاه لغايه امتى؟؟
ياترى هتسيبى المهم وتروحى للى مالوش لازمه لغايه امتى؟؟

ياترى هتبقى النهايه..انك تفوقى وانتى بتوقعى من ع السرير.؟؟

يا محلس يا عسكرى ..هوه فين الفرشاه والمعجون؟؟

يا مجلس يا عسكرى ...هوه انت مش هتعمل حاجه علشان مش نقع من فوق السرير؟

صدقنى الوقوع من فوق السرير بيوجع اوى ..واسأل مجرب..او روح نط من فوق السرير..وسبنا احنا نكمل تحرير

الجمعة، 22 يوليو 2011

برجاااااء التصوووويت

الخميس، 7 يوليو 2011

اين الثوره؟؟!!

اين الثوره

كانت ثوره..ع الظلم اه ع الفساد اه ..ع الراعى اه ..ع الرعيه .....لا

ثوره اقتلعت رموز الفساد ولكن لم تقتلع باقى جذوره

اتفقنا جميعا ع انها ثوره ع انفسنا قبل ان تكون ثوره ع الغير

تعديل لكل شىء فاسد ف كل المجتمع

ولكن حتى الان لا نرى اى تعديلات
اه  الثوره حققت كتير ..بس ف كتير بردو متحققش

بالامس سمعت خبر براءه بعض من الفاسدين المتهمين ف قضايا التربح وسرقه المال العام..اذا لم يكن هم السارقون ..فمن  هو السارق الحقيقى؟؟ الشعب؟

سمعت ايضا انه تم الافراج عن الضباط المتهمين بقتل الشهداء

فمن قتل الشهداء ان لم يكن هؤلاء؟

كيف يغمض لنا جفن وروح الشهيد تريد حقها

كيف يمكننا العيش..ومن مات فدائنا لم يحصل ع اقل حق له

هل نتخيل مدى الالم والمرار الذى يشعر به اهل الشهيد؟
"لا هو عاش ولا ارى مصر الان تعيش"

لا يوجد وصف  فى اى لغات يستطيع تصوير ذلك
انشغلت الصفوه بتحديد ما اذا  كانت الانتخابات اولا ام الدستور اولا

ونسوا حق الثوار..نسوا حق الشهداء..نسوا اهداف الثوره...نسوا مصر..حتى وان ادعوا انهم بذلك يحافظون عن مصر

فمصر ليست دستور قديم او دستور جديد

مصر ليست انتخابات او مجلس قادم او رئيس قادم


مصر هى الان بالنسبه لى ...ارواح الشهداء.....دماء الجرحى...
مصر هى الان ...الفقراء

اين حقوق هؤلاء؟

لا اعلم

 انا كمواطن عادى...لا ارى تعديل فيكى يا مصر ..لا النظام  تغير ولا الشعب تغير

فقط رموز النظام هى من زالت..اما عن النظام فمازال قائما ..لازالت الدوله تعمل بنفس الطريقه...الاسلوب

اما عن الشعب..فقد لاحظت بعد الثوره تعديل بسيط ف سلوكياته

ولكن ..عادت ريما لعادتها القديمه

انتشر الاستغلال بطريقه موسعه

البنزين  لا اعلم ما يحدث له ..ولكن دوما ف ازمات به..ويتم رفع سعره ولا احد يتكلم
اجره المواصلات التى اركبها حتى اصل الى عملى زادت بنسبه20%بلا مبرر ..وتكلمنا  كثيرا..ولكن لا حياه لمن تنادى

مندوبى مصلحه الضرائب انطلقوا ع التجار..ومن لا يريد حساب مظبوط عليه بدفع الاكراميه ويتم نسيانه تمام ..رشوه  يعنى..كل حاجه زى كما كانت
كل الاسعار ارتفعت بشكل كبير..وكل من لديه سلعه يحاول التربح منها بكل السبل
انتشرت البلطجه وهنا اذكر لكم مثال
"صديق لى يحكى موقف حدث معه..هوه لديه محل قطع غيار خاص به ..جاءه شخص وطلب بعض الاشياء وبعد فتره اراد ان يحصل ع نقوده ويرجع له البضاعه ..وهذا لا يجوز لان البضاعه لم تكن ف حالتها وقت الشراء..ماذا حدث؟؟

هدده بأنه سوف يحضر له بلطجيه ...وانتم تعرفون الباقى

الغريب ف الامر ..ان هذا البلطجى يعمل سباك..وكان قد اشترى هذه الاشياء لزوجه رجل شرطه..وكانت موجوده وقت هذه المشكله...وظهر ان السباك قد قبض منها قيمه هذه الاشياء اعلى من ما هى حقيقتها

وهى تريد فقط نقودها

لا يوجد لديها مشكله ان السباك قد احتال عليها ..

واصبح صديقى بين امرين ...اما ان تبلغ  هذه المرأه الشرطه ..او انه يتعرض للبلطجيه
سبحان الله ..ما جمع الا ما وفق ..البلطجيه والشرطه

المهم ان صاحبى ارتضى ارتجاع البضاعه بقيمه اعلى من قيمه بيعها ... تحت التهديد طبعا "

المقصد من هذا الموقف

اين الثوره ع اخلاقنا هنا؟
اين الثوره ع مبادئنا هنا؟
اين الثوره ع انفسنا ؟

اين الثوره؟؟

وهنا اتذكر مقوله لا اعرف من مصدرها ..ولكنى مؤمن بقوتها وصحتها

اصلاح ف قلب الرعيه..خيرمن اصلاح  ف قلب الراعى





وصلنا للنهايه
اشكركم ع المتابعه..ولقاء يتجدد ان قدر لنا الله ذلك