السبت، 29 سبتمبر، 2012

سؤال يا صديقى الملحد


ف دكتورة ع ASKاسمها علياء جاد

كنت قبل كده علقت ع مقوله لها بتقول انها قررت تسيب مصر وهيا عندها 8 سنين ....لان مصر مش عاجباها

وكان تعليقي عن القرار الفظيع ده ف سن الثامنة .....امتى شافت حاجه في مصر علشان تهاجر منها...واى هجره ف سن الثامنة

يقال انها ملحده

انا بصراحه مسألتهاش ..بس ده الكلام ال بيتقال

وقد تكون متحررة شويه

بس الناس بتفهم بمزاجها وبتحكى ف اى حاجه

وبما ان الإلحاد هو  وصف لأي موقف فكري لا يؤمن بوجود إله واعي للوجود،

ف انا قولت  لو فرض أنها ملحدة ..ازاى أقولها ان ربنا موجود وله معجزات ف خلقه ..ومش ممكن يكون مافيش اله للكون

وف نفس الوقت مبقاش بتدخل ف شأنها ولا بفرض أرأى ومعتقداتي عليها ..ولا بهاجم فكرها  وحريتها ف الدين والاعتقاد

سألتها السؤال ده

هل فعلا الطحال غير معلوم وظيفته ايه ف الجسم؟‏

وكان ردها

مين دا اللي مش عارف وظيفة الطحال! أرجوك ما تقوليش مدرس قال لك كدا في المدرسة!ا
الطحال ١- أكبر غدة في الجهاز المناعي (زي اللي عندنا تحت الإبط تلتهب أحيانا، أو اللوز في الحلق)ـ
٢- مخزن لإعادة تدوير كرات الدم الحمراء الميتة واعادة استخدامها في بناء خلايا دم جديدة كل ١٢٠ يوم
٣- ومخزن للدم في حالة الطواريء- لما بننزف كتير مثلا - الطحال بيمتص دم علشا مانفقدوش لبره، ولما نحتاج دم زيادة، هو والكبد بيعصروا نفسهم علشان يدونا دم أكتر في الدورة الدموية، ودا السبب أنك بتشعر بألم في جنبك لما تجري كتير وأنت مش متعود على الجري. دا الطحال و/أو الكبد بيعصروا نفسهم لإعطاءك دم
نقدر نعيش من غير طحال لكنها بتكون عيشة ضنك يعني- كلها أمراض مناعية ويمكن تسبب مشاكل في القلب بسبب فقر الدم المزمن


فانا قولت لها
الف شكر يا دكتور ...
سبحان الله كل ده الطحال بيقوم بيه؟

ربنا فعلا بيثبت انه معجزاته ف الانسان كتيره ..وفضله علينا عظيم


بس كده


هل انا تناولت الموضوع بشكل كويس؟
الحقيقه مش عارف ..انا قولت لو فرضنا انها ملحده ..فهى مش غبيه ..وهتفهم رسالتى او ع الاقل هتفكر ف الكلام

لو مش ملحده ..فكلامى هيكون مطابق لهوى  ف نفسها

ردت عليا وقالت

مش انتو اللي بتكتشفوا. لو عليكم كنتو هتفضلوا لسه فاكرين أن القلب مركز التفكير لول. لقد سخر الله لكم الملحدين الكفرة

طبعا ردها ده اعتقد ممكن يوضح اتجاه تفكيرها ايه

عموما هو امر اكيد يخصها وحدها

ولكن السؤال هنا

اذا كنت لا تؤمن بوجود اله خالق لكل شىء ..

اعطنى تفسير وجودك ..او ابتكر لى ما يحل محل الطحال فى حال فسد وتم استئصاله



الثلاثاء، 18 سبتمبر، 2012

فاشل بدرجة قدير جدااا





من سنه فاتت شاركت فى مسابقة ال100 تدوينه.. بحوالى اربع مشاركات

وكانت النتيجه  انى خسرت


انا زعلت وقتها

بس كان ردى كده


وتقريبا كانت الاسباب فى الخساره من وجهه نظرى .انى كنت متوقف عن انى اكتب اصلا .وكمان انى مافيش جمهور كتير علشان يعمل ليا تصويت ...وكنت مبسوط بالتدونتين الى اخدوا 3/5
وقولت كويس

السنه الجايه بقى اكيد هقدر اعدى المرحله  دى على اساس ان الاسلوب هيتطور والافكار هتبقى اكتر وكده
وبدات اركز اكتر

2012
من شويه ايام ..جات المسابقه الجديده
قولت الفرصه اهى جات ..وقدمت تلات حاجات

قصه....كانت عاجبه ناس كتيره


ومقال

وخاطره
مش فاكر انهى بالظبط بس هي واحده من دول




وقولت اقل حاجه ممكن اعملها ان القصه تدخل ب3 درجات وبعدين ربنا يسهل

اتصدمت لما لقيت ان التلاته بره اصلا .....يعنى حتى مش جابوا 3/5

طبعا  انا تقريبا مكتئب او مش قادر احدد حالتى بالظبط

بس انا قبل المسابقه ..قولت انى لو خرجت  يبقى كده فعلا اثبت انى مش نافع ف الموضوع ده..ونبطل بقى

طبعا ردود الافعال ع كلامى ده امبارح ع الفيس كانت متباينه ..بس ف ناس اكدت ليا ان منفعش فعلاا

وعليه قررت اعفيكوا من سخافاتى وترهاتى

ويظل قلمى مرفوع من العمل لأجل غير مسمى

ع هامش التدوينات ال نجحت 

..انا شوفت  حاجات حلوه جدا فعلا....وكان ف وحش بردو ..

مش عارف رؤيتى لبعضهم  اقل من ماكتبت انا  نفسنه ولا ايه ؟

ممكن يكون اختلاف ف وجهات النظر بس

وممكن اكون انا كمان مش بعرف احكم ع حاجه قريتها 

كل شىء جايز

ملحوظه


انا حاولت اكتب التدوينه دى بأسوا اسلوب ممكن اوصل له علشان كل ما افكر ارجع اشوف الكلام ده اقتنع انى فاشل ف الموضوع ده واسكت 


اقعدوا بالعافيه بقى ..استمتعت بتعليقاتكم طول المده ال فاتت




الخميس، 13 سبتمبر، 2012

سأعود مادمت حيا


معاتيه فـ تيه العشق .. هايمين هيام

رايحين جايين .. في الشوارع نيام



أن تحب حد العشق
............. حد النسيان
نسيان الدنيا...وتذكر من تحب
فقط من تحب
أن أحبكِ
أن تكون الحياة أنـــــتِ
أن تكون الروح أنـــــتِ
أن تكون البسمة أنـــــتِ
لازلت عند رأى,,,,,, ابتسامتكِ تمنحني إشراقه لأيام ..حتى وان كنت غاضب منك
انشراح صدر...إقبال على الحياة..وتمحو من الذاكرة.....معنى الألم
حبيبتي,,,,,,,,,,,دامت ابتسامتك

الحب حلم و بس .. و لا بصحيح

والدنيا حلوة و شمس .. ?و لا غيام
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

بالأمس كان يوماً حافلاً ,,,,,,لأول مره منذ أيام كثيرة استمتع بالنوم إلى العاشرة...كم اعشق أيام الأجازات ...وكم أعشق أكثر رحلاتي  إلى القاهرة..أستمتع كثيرا باستكشافها ..فهي على الدوام مبهره ..وكل زيارة اكتشف المزيد....

ومازالت تفاجئني القاهرة......مليئه بالتفاصيل
وانا عاشق للتفاصيل ... 
محبوبتى ...مدينه التفاصيل
استمعت بيوم خط كثير من التفاصيل فى صدرى...تفاصيل غير قابله للنسيان   

كانت لدى صحبه لا يمكن وصفها بالكلمات ...رائعه..برغم كل شىء  

من أهم الاحداث فى ذلك يوم ..تم التعاقد مع دار ليلى على نشر كتاب جماعى انا مشارك فيه مع نخبه جميله .اسمه صندوق ورق
وأيضا حضرت مناقشه  ديوان للشاعره روناء صبرى ..استمعت فيها بقصائدها وقصائد بعض الحاضرين ..وايضا لا ننسى عزف العود الرائع من الاستاذ على

مر وقتى سريعا..كالبرق

سأظل اختفل بهذا اليوم المختلف ..الأربعاء 12-9-2012

سأعود مادمت حيا يا قاهره
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

كام واد و بنت اتقابلو عبر السنين

كام همسه همسوها .. و لمسة حنين