ياما نفسى اشوفك منصوره...يا منصوره

 المنصوره

بلدى بلدك

احسن ناس

اجدع ناس

اول ما تتعرف ع حد مش من المنصوره

ويعرف انك من المنصوره

يقولك ايوه ياعم الناس الحلوه

مش عارف هو بيقول حلوه ازاى وهو شايفنى قدامه  :P

المهم اتفقنا او تم اقتراح فكره اننا نكتب عن المنصوره.انا قولت ف نفسى الغالب كله هيكتب عن الكويس والحلو فيها بس البلد مليانه مشكلات...وتقريبا فانوس الحلول ضاع من المحافظه والمحافظ

او ان ف مشكله ف دعك الفانوس

او ان العفريت نفسه ال بيطلع بالحلول مبقاش عارف يحل مشاكل البلد ازاى

المنصوره ..زيها زى تقريبا اى بلد ف مصر ...مليانه مشاكل


ال قادر افتكره دلوقتى

الزباله

مش هقول ان البلد مش نظيفه...لا  انا فعلا بشوف ف المنصوره عمال نظافه ..وعربيات نظافه

المشكله انه الكلام ده ف المنصوره وفقط ..العاصمه وبس ..وف الاماكن الرئيسيه...انما لو دخلنا شويه ف الشوارع الاقل اهميه ..اتفرج يا سلام بقى ع النظافه ال ع حق

كمان البلاد التانيه غير المنصوره

ماهى الدقهليه مش منصوره وبس

ف بلاد تانيه .وف بلاد صغيره غرقانه ف مشاكل

وده هيخلينا نرجع تانى ان لو المحافظ مش عارف عن الكلام ده

يبقى الافضل فعلا ان المحافظ يكون شخصيه من البلد علشان ع الاقل يكون عارف هوه حدود محافظته منين لـــ فين 

وال يغيظ بجد ..تلاقى صناديق الزباله موجوده فاضيه ..والزباله جمبها ف الارض اكوااااااام..يعنى الناس عندها كسل حتى ف رمى الزباله ...لازم يقف بعيييييد ..ويرمى الكيس....وف بقى ال يخليك ماشى ف الشارع ف امانه الله ..وفجأه ..بم بم ..اكياس زباله نازله من الشبابيك  ع الارض 

انا سألت نفسى كتير ايه السر ف كده...ومش لقيت حل غير انه اكيد ده فريق كره السله او رمى القرص ..ايوه ..اكيد دول مشاركين ف دوره الألعاب الأولمبية واكيد ده تدريب ليهم ..عاااااااااااااااا

زبالتنا ف كل مكان ...ابيض واسود ....وكمان ...الوان

زبالتنا ف كل الحاره..ودى طبعا مش شطاره

زبالتنا ماليه الكون..ماشيين عليها...لا.. ده كمان بنعوووم

زبالتنا تحفه فنيه..بره صناديقها مرميه

واكتر حاجه تضايقك ...انك تلاقى ف عربيات زباله ..وف عمال نظافه...ووقت ما يكونوا بيجمعوا الزباله ..تلاقى العربيه ماشيه ..والزباله بتقع منها

يا حلاوووووه

وده يبقى اسم ايه بقى؟؟

العمال بتشيل  من الارض وترمى ع العربيه..وخلاص

مش مشكله بقى ان ف ناس ف الجمب التانى ..مش مشكله ان الزباله دى تقع عليهم
لا عادى
كل ده مش مشكله

لا وكله بقى كوم وتوقيت جمع الزباله ده كوم تانى

لازم ينزلوا يجمعوا ف وقت زروه

يعنى يا الصبح بدرى..والناس رايحه اشغالها

يا بعد الظهر ونصف الناس مروحه بيوتها

يا اخر اليوم وباقى الناس مروحه من الشغل

مينفعش ف نص الليل؟

مينفعش بعد الفجر ع طول؟

حد هيقولى والناس هتصحى بدرى او هتسهر شيفت نايت علشان الزباله

هقوله ما هما هيبقى مواعيدهم كده

انما مينزلوش يعملوا زحمه

 الزحمه

وطالما طلعنا من النظافه ع الزحمه

نقول بقى

البلد كلها تقريبا زحمه

مفيهاش شارع فاضى

وده لان الناس كتير
والبلد متقسمه غلط اصلا


البحر كله دايما زحمه... شارع بورسعيد...قناة السويس...عبدالسلام عارف ...عند الجامعه من فوق وتحت..جيهان

فين كمان ؟

الخروج والدخول من ناحيه الدراسات وجديله ....الشرقاويه

كتيييير اماكن تانيه بس انا مش حافظ الاسامى قوى

مثلا  كلنا عارفين انهم قافلين الشارع ال بين الاستاد والسجن علشان الجيش حاط دبابات وعساكر هناك علشان تأمين السجن

وكانت الناس يا بتلف من ورا الاستاد ..يا بتدخل من شارع 10

من كام يوم فتحوا ناحيه من النواحى  ال ف الشارع ده ..والدنيا كانت ماشيه كويس

امبارح قفلوها تانى وبيزودا الحراسه والدبابات...ع ال جرى بقى

اختاروا يوم غلط ..يوم خميس ....يعنى زحمه زحمه يعنى

ممكن يكونوا اختاروه علشان النهارده ف جمعه ومليونيه وكده

بس قفلوا الشارع ..واتفرج بقى ع الزحمه ال ع حق ..الدنيا تقريبا اتقفلت .عربيات نقل وميكروباصات وتاكسى وملاكى ..من كل نوع

لا حد بيسمع للتانى ..ولا حد بيتحرك

ايه الحل؟؟
اى دونت نو

بس البلد فيها زحمه السنين فعلا


البطاله

وعن البطاله ..حدث ولا حرج

البلد اصلا مفيهاش استثمارات من ال يتقال عليها مشروعات تنميه لبلد وف نفس الوقت تستوعب عماله

انا تقريبا كل دفعتى خارج مصر او ف القاهره ....لان مفيش شغل ..ولو لقيت ..المرتبات تقطع القلب ..اهىء اهىء

مش بقول كده علشان عاوز وظيفه حكوميه ولا علشان  عاوز مرتب كبير

انا عاوز مشروع تنميه للبلد ...استغلال انها بلد المفترض انه زراعى..وف اراضى زراعيه ..وف اراضى للاستصلاح ..بس كل ده يتعمل بهدف رفع البلد اقتصاديا واستغلال مواردها

علشان نحل شويه من البطاله ال ماليه الدنيا

عمر افندى مثلا

انا فكرت انه لو ينفع مجموعه من الشباب تاخد المقر الخاص بعمر افندى ف المنصوره مثلا او ف اى مركز تانى ..لانه ما شاء الله منتشر

وتبقى مسؤله عن ادارته وتمويله ...يعنى مش هنكلف المحافظه ولا البلد حاجه..غير انها تعطينا المكان حق انتفاع بشروط معينه ول فتره معينه

وطبعا عاوزين اعفاء من الايجار...بس علينا مصاريفه ..واننا لما ننتهى نسلمه زى ما استلمناه..وكهرباء وباقى المصاريف علينا

هيجى واحد يقولى ..طيب ايه الفايده ع البلد ..هقوله  اولا عمر افندى مقفول مقفول ..يعنى مفيش فايده جايه منه حاليا ..الفايده الاهم ..اننا هنشغل ناس

ده غير اننا نفسنا هنشتغل عليه

وده ف حد ذاته نجاح

ودى مجرد فكره مبدئيه ..ممكن يكون ف افكار افضل بكتير

بس الاهم اننا  هيبقى خيرنا لينا

بدل ما حد تانى يجى يشتريه بتراب الفلوس


التكاتك

بيب بيب

مفيش شك التوك توك ..حل مشاكل لناس

اهمها انه شغل ناس كتير

ومفيد بردو انه بيوصل لكل مكان ...واجرته صغيره ع قد كل الناس


بس طبعا  ف بلاوى بتحصل من وراه

وكمان ال بيتسمك منها بيحصل له مشاكل..طيب دخل لي البلد اصلا وازاى ..طالما مالوش رخصه ومالوش اى حاجه؟؟

ف طالما له فوايد..وله عيوب...ياريت نشوف حل ل عيوبه دى

يتعمل له قانون مثلا ..ويتعمل له رخص واوراق


انما ميبقاش كده

........................................................


طبعا انا اتكلمت بس عن المشاكل ..لان الحاجات الحلوه ف المنصوره مش محتاج انى افكر حد بيها


بس المشاكل دايما بتتنسى

اقعدوا بالعافيه

حبه حاجات... من الـــ جى ..ومن الـــ فات

شهاده المشير

سمعت كلام كتير جدا عن امل الناس ف شهاده المشير

بس مش عارف انا لوحدى ال اتمنيت ان المشير يشهد شهاده ف صالح مبارك

ده غير طبعا احنا اسفين يا مخلوع


بس اكيد الهدف مختلف

ممكن حد يقولى ويهاجمنى....

انت عاوز المشير يشهد لـــ صالح مبارك ..اه يا فلول

هقوله لا فلول ولا حاجه

بس انا ليا فكر

لو جاهز تسمع

اسمع يا سيدى

السيناريو كان هيبقى كــ التالى لو المشير شهد ضد مبارك ولبسه ف الحيطه

الناس هتطلع تهلل وتزغرط ...ويهتفوا بحياه المشير واسمه..وامجاده

وبما اننا شعب يجيد صناعه الابطال

وعاش الملك ..مات الملك

وبكده  تبقى عملت اسطوره تانيه ....نحلف بحياتها شويه

وبدل ما تبقى اول طلعه جويه فتحت باب الحريه..ال فضلنا نحلف بيها من يوم الحرب لقبل الثوره بيوم

تبقى اول شهاده سريه....نفخت المخلوع...وادت المشير هديه

بس ال حصل كان غير ..ال حصل بردو مش زى مانا كنت بتمنى ..ولا زى ما كان اى حد متوقع اصلا

اصل حاجه غريبه جدا ..ان المشير لما يتسأل ...يبقى اغلب اجاباته.....(السؤال ده من بره المنهج)....يعنى ايه اهم رجل ف مصر ..ميعرفش ال بيحصل فيها؟

ف احتمالات كتيره  ترد ع شهاده المشير
 منها
 ان هوه فعلا ميعرفش حاجه وشهادته سليمه

وده ف وجهه نظرى ..مصيبه ..ان المفروض ف وقت زى ده يكون هوه عارف كل حاجه ..

مش عارف بقى الطبيعى انه ميبقاش عارف ولا ايه

وبعدين الموقف ده يبضحكنى .

تخيلوا معايا

كنت فين وقت ضرب النار.؟..كنت بأمن البلد...ده ع اساس ان تامين البلد بيبقى من خطر خارجى وبس.....مفيش اخطار داخليه ......اممم.....تانى رجل ف البلاد ..وميعرفش مين اعطى اوامر ضرب النار...امال مين ال كان بيتكلم ف حفل التخرج وبيقول اننا جالنا اوامر ضرب ومضربناش؟؟....الموقف ده بيفكرنى بسعيد صالح ....اذاكر وانجح؟؟ الاتنين ؟؟ :(....شكلنا كده ف انتظار براءه السيد المخلوع...ولا عزاء للثوار


 :(

ده مجرد تخيل




ثانيها انه بيحاول يطلع حسنى بناء ع اتفاق بينهم ..زى ما بعض الناس بتقول


وده بقى مصيبتين ف بعض

علشان حقوق الناس ال ماتت وال اتصابت وال طلعت ف الثوره علشان حريتها

ولو فعلا بيعمل كده

فانا ردى عليه  هيكون


بخصوص شهادك 

ويمكرون ويمكر الله ..والله خير الماكرين

..المهم ..انا عاوز حقوق الناس ترجع...بس ابوس ايديكوا .. متعملوش لينا ابطاااال ... كفايه كده..مش عاوزين ابطال ..
..........................................
فـــــــــــــــا صـــــــــــل
...........................................
نيجى بقى للى بيحصل ف البلد دلوقتى ...بعد ما كنا ايام الثوره ..ايد واحده ...ومفيش فرق بين وفد وتجمع ولا اخوان وسلفى..دلوقتى جات  الفره...الشعب جاله تشققات ..عاوزين نشوف له نوع كريم كويس علشان يظبطه

او نجيب شيكارتين اسمنت وشويه رمل ..ونمحره ف بعضه

كل مجموعه فرحانه بنفسها

بس ده ال هيضيع فعلا حقوق ال ماتوا ..وحقوق الشعب كله

الصفوه بداوا تانى يدورا ع مصالحهم

وكل واحد فعليا دلوقتى بياخد نصيبه من التورته


الثوره مش بترجع للخلف

الثوره بتندفن ف الارض


اتخيلنى بعد عمر طويل
ويسألنى حفيدى

جدو

لماذا قمنا بالثوره ؟

فانظر اليه ف حياء ..واخفض نظرى الى االارض
واقول له

يعنى ايه شوره يا حبيبى؟

او من الممكن ان اقول له ...كان عندنا زياده ف الشباب وبطاله

فقلنا نموت شويه

وندخل الباقى السجن .اهو يخدموا مصر
..........................................
فـــــــــــــــا صـــــــــــل
...........................................

ولا حكايه بقى رئيس الجمهوريه

دى بقى فيلم تانى


كل يومين الاقى مرشح طالع

عادى حاجه سهله خالص

ادعك الفانوس..يطلع مرشح جديد

قول جزرررررر بس

هيطلعك مرشح جديد


وكل مرشح ..يمسك نقطه الشعب عاوزها

وهاتك يا تفعيص

انا هعمل وهعمل


هتعمل ايه ياعم الحاج

هعمل ال انتوا عاوزينه


والناس تفرح

وتهيص


محدش بيقولوا

هتعمل ازاى؟

هتقول جزرررر بردو؟

فين البرنامج


تلاقى رزمه ورق قدام عنيك

وعيش انت فيها بقى

ياعم

ادينى أليااااااات هتشتغل بيها


م الاخر ....احنا بنتعرض لاكبر اشتغاله كونيه


مثلا نقلا عن شبكه 6 ابريل ..قريت الخبر ده  ع الفيس

المرشح: أول قرار لى كرئيس للجمهورية هو وقف تصدير الغاز المصرى لاسرائيل

شكلك فاهم يا نصه..
هاها معرفتشك انا كده؟؟.
كل واحد عاوز يبقى رئيس جمهوريه يمسك ف حته الناس زعلانه منها ..وهات يا ضرب....

ياترى هيعرفنا بقى هيعمل كده ازاى او برنامجه هيتفذ ازاى .. ولا هوه هرى امهات ف الفاضى ولا ايه ؟

طبعا انا مش بتكلم ع شخص المرشح ...هاتولى اى حد ينفذ برنامج صح ويعرفنى هينفذه ازاى ..وانا انتخبه


انما احنا بنمسك ف الشكليات ..وسبنا الحاجات المهمه ال نتكلم فيها

..........................................
فـــــــــــــــا صـــــــــــل
...........................................
حاجه جديده كمان 

للمرة الثانية خلال أسبوع .. وقف توزيع العدد الجديد من جريدة الفجر لإحتوائه على عناوين ساخنة لا يتحملها المجلس العسكرى والسلطة الإنتقالية

لا لحكم العسكر

ايون لا والف لا

احنا كده معملناش حاجه
رجعنا زى ما كنا تانى

قولنا عيش حريه عداله اجتماعيه


ومفيش حاجه منها اتعملت


هقول حاجه  بقى

انا واحد من الناس ال ساندت الثوره  ب الكى بورد والدعاء

يعنى ولا حاجه

تقريبا مش من الثوار

الثوار ال بجد ال نزلوا الشارع


وبقول كده لانى مش من هواه ركوب الموجه ولا تقسيم التورته

وبقول كده بردو لانى منزلتش علشان كنت متلخبط..ومش عارف فين الصح وفين الغلط ....كنت واحد اقصى حدود تخيله للفساد او السرقه والنهب.. موصلتش لاقل رقم ظهر منهوب

مكنتش عندى الخلفيه السياسيه ال توضح ليا مين مع مين ..ومين بيقول ايه

كنت واحد من المتابعين للاعلام المصرى

وهذا يكفى انه يبقى عندى تلوث فكرى ...عاوز ستين سنه علشان اتعالج منه

انا منزلتش

 ا ل منزلش ولا مره..هينزل  دلوقتى ..لان ال بيحصل ما يتسكتش عليه


يبقى توصياتى

يا شعبى يا حبيبى يا شريانى

سيب التشقق ...وارجع كتله واحده تانى

عاوزين نرجع زى اليوم ده(25)

يا مجلس يا عسكرى

ارجع زى ما كنت ..ثكناتك اولى بي

الحب الافلاطونى(تخاريف قبل النوم)

الحب الافلاطونى(تخاريف قبل النوم)

حب....لا لشىء...الا للحب


حب يظهر فيه صفاء النفس وعفتها

حب ابدى....هو خالد....هو امنيه

من الممكن ان يتمتع بالخلود

ولكنه يظل ف الامنيات...فقط امنيات

................................................................

شاءت الاقدار ان تجمعهم .....

تلاقت النظرات.....

خفقت القلوب

تقاربت 

تباعدت
...................................................................

قد كان حب......ولكن فى غير موعده

قد نبض قلب.....ولكن فى غير وقته

ليته وقف

ليته مات 

ليته ينسى الذكريات 

ليته ينسى الامنيات 

.......................................................................

ان قلت يوما ان هذا خرافات

فبماذا تفسر ما ف حنايا القلب

من اهات

.........................................................................

حب تم ...واستمر ..وكان

اتى .....وابتعد  مع الزمان

....................................

قد قالها فاروق جويده ..واقولها من بعده

“مازال في قلبي بقايا .. أمنية
أن نلتقي يوماً ويجمعنا .. الربيع
أن تنتهي أحزاننا
أن تجمع الأقدار يوماً شملنا”

يجعله عامر

المكان :شارع عبدالسلام عارف-المنصوره

الزمان : بعد الرابعه عصرا

الحدث:ارتطام بين سيارتين

سلامو عليكو...ده انا خالد ..ايوه ايوه صاحبكوااااا......ايه ؟؟ علوا صوتكوا شويه ......يا اخوانا مش سامع....طيب استنوا كده.....

وبكل هدوء..وطى التسجيل ده يا اسطى...يا اسطى... يا ااااااسطى...الله

هوه الاسطى ده مبيسمعش ولا ايه ؟

وطى التسجيل ياعم مش سامع.....شكلى كده هعلمها معاك ..ولا ايه 

...................

....

..

احم 

واضح ان الاسطى  مجاش النهارده

خلاص علوا انتوا صوتكوا انتوا بقى

ايه ..اها ..بتقولوا رايح فين...لا انا رايح الشغل الاضافى عقبال عندكوا...

الله ..وبعدين بقى ف المطبات ال الجدع ده عمال ياكلها ..انا قاعد ف الكرسى الاخير ..وانا طويل..وكل شويه  راسى تتخبط ف سقف العربيه

يابن ال....استغفر الله العظيم ..الله يسامحك ..الحمد لله .....بلا اهو تكفير للذنوب

الله ..تانى ..ياد يابن  ال...... استغفر الله العظيم ...الحمد لله

الله ...ياد يابن التيت انت ...(طبعا كل الكلام ده بينى وبين نفسى )استغفر الله العظيم ..خلينى ساكت

قولت حل الفيلم ده ..بما انى مفيش غيرى ف الميكروباص..انزل شويه ف الكرسى...علشان اتفادى خبطه الراس دى

المهم ..غمضت عينى وقعدت افكر هكتب ايه ف التدوينه الخاصه بالمنصوره..وكمان عاوز اكتب حاجات تانيه علشان عاوز ابعتها 

لمجله اشيائى ..يمكن تتنشر

وف عز ما الافكار نازله زى المطر..اذ فجأه .

تيييت اعاااا..اوووو...اى...دش


الاقى نفسى فين بقى بعد ماكنت ف اخر كرسى؟؟

ع الباب..مرمى ع الباب بتاع الميكروباص.وحاسس بالاااااام جامده ..اتارى ظهرى اتخبط ف البتاع ال بتبقى ف ظهر الكرسى ال جمب السواق

ع لما قومت بقى ...وقعدت ابص ع نفسى كده واشوف ايه ال ناقص ..وايه ال مكسور

اكتشتف ان كل حاجه سليمه والحمد لله ..بس ف الاااااام ..تقريبا بقى رضوض او كدمات من الخبطه

وسمعت صوت خناقه..اتارى سواق الميكروباص بيتخانق مع صاحب الملاكى اللانسر  ال اتخبط فيه.....قولت اخلع انا بقى

لانهم لو طلبوا الشرطه

اكيد عمرهم ما هيقولوا ان السواق كان ماشى بسرعه كبيره لا تتناسب مع  شارع زى ده..وف منطقه سكنيه

ولا هيقولوا ان مافيش اى عسكرى مرور الواحد بيشوفه طول اليوم .وبالتالى فالسواقين واخدين راحتهم ع الاخر

ولا هيقولوا ان صاحب الملاكى كان داخل مخالف وبالتالى حصل ال حصل

انما هيطلع ال حصل ده نتيجه لافكارى ال كانت نازله زى المطر..وبالتالى  العربيات اتزحلقت وحصل ال حصل

يلا الحمد لله

كنا هنروح ف داهيه لكن ربنا ستر

ال يغيظ بقى ...انى كنت ماشى بضحك اوى مش عارف ليه ..كل ما افتكر انى كنت ف اخر كرسى وبقيت ف اول كرسى

رجاء يا اخوانا ...ال يقابل منكوا المحافظ..يبقى يقولوا يشوف المرور بتاع المحافظه لسه مجاش م الاجازه ليه ..وليه سايبين الدنيا زايطه كده 

ويجلعه عامر ياعم الحاج:)




وف النهايه ..الحمد لله انى طلعت كويس ..ومكنش مصيرى كده

واحد مننا

ورشه السناريو..النهارده كان اول يوم للورشه..والمفترض انى اقدم بكره حاجه كتبتها ..لان د غاده طلبت ده من كل الموجودين ...مش عارف ال انا كتبته ده هينفع ولا ايه ..انا حتى بفكر مروحش :D ...بس انا بحاول..وحبيت عرضوا عليكوا هنا ..بردو اعرف الاراء بتاعتكوا 

......................................................................

توقف المرور ف الشارع ارتفعت ابواق السيارت تتعجل الذهاب

رجل عجوز يجلس دائما ف الطريق..انتقى جانب من الشارع  واستند بظهره الى احد الاشجار الموجوده ع جانب الطريق...لا تتغير جلسته ...يختفى احيانا ثم يظهر من جديد ..ولكن غالبا ما يكون فى هذا المكان

ف حر الصيف تجده يجلس ...ف برد الشتاء.....اصبح احد معالم الطريق...ملامحه وهيئته تدل ع انه لم يتمكن من الاستحمام  منذ قرن مضى

يمر عليه المئات يوميا ..ولكن قليلا من يستوقفه هذا الرجل ..قليلا من يتساءل................قليلا من يلحظه

يجلس...لا يدرى اين هو ..او من هو....لا يتذكر شىء...فقط يجلس...لا يسمع من حوله الا  اصوات الشارع وضجيجه

جسده ياكله المرض..ولكن لا احد يدرى بما به......ربما هو ايضا اصبح لا يدرى


من داخل السيارات

..............
على

شخص مرح ..لا يحمل للدنيا هما..يعمل محاسب ف احد البنوك الكبيره...لديه زوجه...واطفال ...والحياه بالنسبه له جميله لا مشاكل فيها ...
ربما يمر اكثر من مره ع هذا الرجل...وغالبا ان لاحظه..لا يشغل باله بوجوده او اسباب ما به

يتحدث ف الهاتف مع زوجته...يخبرها انه  ف الطريق الى المنزل

يتناقشان...... اين سيقضون الاجازه الاسبوعيه ..وعن خططهم لشراء بعض الاشياء .....كنوع من التجديد ف المنزل......وتغيير السياره

لم يفكر ف لحظه او يستوقفه ...مدى الفضل والكرم من الله ..الذى يعيش فيه...او يضع نفسه ف مقارنه مع هذا الرجل

هو ايضا لم يفكر ف يوم ان يحاول مساعدته ماديا

........................


مدام احسان وطفلها

مدرسه .........اسمها  لا علاقه له بها اطلاقا

فهى ترفض فكره ان تخرج شيئا لهؤلاء الشحاتين ..ومقتنعه تمام انهم اغنى منها مئات المرات

وان التسول اصبح مهنه يقتات بها الناس ارزاقهم

هى ايضا رئيسه لاحدى جمعيات المرأه

ودائما ما تردد كلام عن المتسولين ..والحاحهم ف الطلب.وعن مدى ثراؤهم الخفى  ف اجتماعاتها عند مناقشه المشاكل اليوميه للمرأه والمجتمع عموما


هى مطلقه من عده سنوات ولديها طفل ف مرحلته الابتدايئه من التعليم

 يخاطبها ابنها ..سائلا اياها عن هذا الرجل الجالس ف الشارع ف هذا الوقت ..وعن ماذا يفعل

فتجيبه بأن يصرف نظره عنه..فهو شحااااات

لا يدرك الطفل مغزى كلام والدته..فيطلب منها ان كان كذلك ان يذهب ويعطيه بعض الحلوى او النقود من مصروفه

يتجاوز صوت مدام احسان كل الاصوات  المحيطه بهم وهى تصرخ ف طفلها ان هذا الرجل يخطف الاولاد وياكلهم

وانه لو استمر ف النظر اليه .سوف يأتيه ليلا ويذهب به بعيدا عن العابه وغرفته

نظرة هلع تظهر ع الطفل....يغوص ف مقعده اكثر واكثر ..وهو يتخيل هذا الرجل ف شكل ابو رجل مسلوخه...او امنا الغوله ..او اى شخصيه خرافيه ممن سمع بهم ف قصص الخيال

ويقرر بينه وبين نفسه ..وبقرار لابد وانه سينال اعجاب والدته....انه لن يقترب ابدا من هذا الرجل
..................................

سمسه وميمى

صديقتان ....تحاولان المرور بين السيارت المتوقفه فى الشارع ...يتحدثان سويا عن خطط اليوم لديهم ...هما طالبتان ف الجامعه ..وذاهبتان لشراء احتياجاتهم من الملابس والاكسسوار ..استعداد للعام الجديد

مرا بجوار هذا الرجل ...لم تتوقف سمسه كثيرا عنده ..ربما يكون دار ف ذهنها بعض التساؤلات عن ماذا يفعل هنا وما الذى ادى به الى هذا الحال

ولكنها ظلت تساؤلات .لم تخبر صديقتها بها الا عندما وجدت ميمى تتوقف وتعود الى الرجل مره اخرى

سمسه : ايه يا بنتى رااايحه فيين ..يلا خلينا نخلص من الزحمه دى

ميمى : ثوانى بس تعالى

سمسه : رايحه فين يا مجنونه ..تعالى هنا لا يعمل فيكى حاجه

ميمى:يوووه..افلام الرعب  وسنينها..دى بقى الاثار ال بتسيبها ..بتعمل تلوث ف الدماغ

تذهب ميمى :تضع يدها ف شنطتها...تخرج ما تيسر لها .وتضعه ف يد الرجل

يشعر بها ..يتحسس النقود...يتمتم ببعض الادعيه لها

تعود الى صديقتها

سمسه: كنتى بتعملى ايه ؟
ميمى : هكون بعمل ايه يعنى؟؟ بساعده

سمسه: ده احنا  ال عاوزين حد يساعدنا ..يابنتى انتى كده بتشجعيه ميشتغلش ....وهو كده هيفضل يتسول طول عمره

ميمى : مش هدخل معاكى ف مناقشات من النوع ده..بس هقولك حاجه واحده بس..لو انتى ف سنه ده..قوليلى شغل ايه ال هتقدرى عليه..وهتقدرى تتحمليه..ده لو هيبيع مناديل ..مش هيكسب لو قعد كده..سنه كبير اوى ..والمفترض انه يدخل دار  رعايه او حاجه من دى .مش تقوليلى يشتغل

وبعدين انا طالما مش قادره اوفر له الشغل ده او اساعده يكون له حياه كريمه..يبقى اعطيله ال اقدر عليه بقى وربنا يحلها له من عنده

سمسمه:امممم مش عارفه . ما علينا ..قوليلى انتى قولتى هتجيب لبسك الوان ايه ؟؟

.....................................


عم عبده وزوجته

امام مسجد ف قريه صغيره..اتى مع زوجته الى المدينه حتى يعرضها على الاطباء..حيث انها مريضه من فتره ...وطبيبه الوحده نصحته بعرضها سريعا على الاطباء فى المركز المتخصص لمثل هذه الحالات

ينزل عم عبده وزوجته من المركز الكائن ف نفس الشارع ..على وجهه علامات الفرح حيث بشره الطبيب بان علاج زوجته ممكن ولكن فقط باتباع التعليمات والمتابعه

أشار عليها ان يذهبا الى اى مطعم ختى يتناولان الغذاء..ومن بعده يسلكان طريق العوده الى بلدتهم الصغيره

زوجه عم عبده: شوف الراجل ال هناك ديه ..هوه ماله يا اخويا ؟؟

عم عبده: لاحول ولا قوه الا بالله ..الحمد لله الذى عافانا مما ابتلى به كثيرا من خلقه...شوفتى الدنيا يا حاجه؟؟ ولا تسوى..ياترى الراجل ده عايش كده ليه ولا فين اهله ولا عياله؟

زوجه عم عبده : ربنا يتولاه ياحاج..ال يشوف بلاوى الناس ..تهون عليه بلوته..ربنا ما يكتبها علينا يارب

وصلوا المطعم

عم عبده طلب 3 طلبات
زوجه عم عبده:انت جعان اوى كده ولا ايه ياحاج؟؟

عم عبده: الاكل ده للراجل ال بره يا حاجه..علشان لو ف يوم حصل لنا زيه..يبقى ف حد يفتكرنا بأى شىء

...................................

مضى الزحام ...وانفرجت الازمه ..ومضى كل واحد ف طريقه

وبقى الطريق..وبقيت الشجره..وبقى الرجل ف مكانه...ينتظر قطعه نقديه من هذا..نظره ...قطعه خبز

مأساه تتكرر كثيرا ..نراها  كلنا..قليلا ما نتفاعل معها ...

منا من لا يلاحظها ..منا من يتجنبها ..منا من يشارك ف اصلاحها

ولا ندرى جميعا ان هذه الحالات هى افرازات اساسيه لدنيانا..وبالتالى فنحن مسؤلون عنها مسؤليه كامله

الديموكتاريه الامريكيه

ديكتاتورية

ديمقراطية

الديموكتاريه الامريكيه

تتغنى دوما  الدوله الامريكيه بالديمقراطيه وسبل تحقيقها

تتحدث دوما عن انه لابد من توفير الديمقراطيه ف البلاد الاخرى

تجدهم دائما ينادون بالحريات

ولكن اين ذلك من التصرفات ع ارض الواقع؟!!

تجدهم يملئون الدنيا  كلام عن ان للشعوب حق تقرير المصير

وفجأه 

!!!

تجدها تقرر مصيرهم ..وتقوم باحتلال اراضيهم
بدعوى انقاذ شعوب العالم من الظلم والطغيان 

اتسال هنا ..انقاذ شعوب العالم ام انقاذ شعوبكم انتم وامدادها بالبترول؟

ثم لماذا يتوجب عليكم انقاذ الشعوب صاحبه الاراضى المليئه بالبترول؟

تجدهم ينادون دوما بالديمقراطيه ومميزاتها وواجباتها

اين الديمقراطيه ف استخدام حق الفيتو دوما ف رفض الاعتراف بالدوله الفلسطينيه!!

اين الديمقراطيه ف وجود مثل هذا الشىء المسمى بالفيتو!!

اى ديمقراطيه تسمح لدوله بفرض رأيها ع باقى العالم

فقط

بحق الفيتو

اين الديمقراطيه
ف مسانده كيان مغتصب!!

ودعمه ع طول الخط

بل والاعتراف بوجوده

والتأكيد ع حقوقه ف الدفاع والعيش

ع الرغم من انه كيان متطفل

كيف اعطى الحق  ل "الطفيل" ان  يعيش ويمارس حياته 

ولا اعطى الحق نفسه لل"العائل"الذى يعيش عليه هذا الطفيل

كيف لا نسمع صوتك   عند مقتل جنودنا  ع الحدود

عند ازهاق الارواح ف فلسطين  وف العديد من البلدان

ونجدك تنتفض  عند اعتداء ع سفاره  يهوديه


وتطالب وتحذر !!!

اجدنى هنا اقتبس عباره الرفيق  معمر القزازى

من انتم؟؟؟

من نصبكم  ع العالم !!

من اعطاكم الحق ف التدخل ف شئون الدول باسم الديمقراطيه؟

اعتقد اننا نعيش كدبه تسمى ديمقراطيه

الدكتاتورية هي شكل من أشكال الحكم تكون فيه السلطة مطلقة في يد فرد واحد

أليست الان السلطه ف يد امريكا فقط؟؟

اين هى اذن الديمقراطيه وحقوق تقرير المصير؟

الديمقراطية تعني في الأصل حكم الشعب لنفسه

اين حكم الشعب لنفسه؟؟


تصرفات امريكا تدفعنى الى التفكير والتشكيك ف مفهوم الديمقراطيه نفسه

فمن المحتمل ان يكون المعنى غير مفهوم لدينا

اعتقد ان الديمقراطيه هى الديكتاتوريه من الاغلبيه ع الاقليه

رأى الاغلبيه ينفذ

حتى ولو خطأ

هى ديكتاتوريه مستتره

خلف المعانى البراقه

والاهداف الساااااااااااااااميه(وهنا اقصد الاهداف النبيله) ولك الحق ف ان تقرأها كما تريد فهى تحمل المعنى الاهم

الذى يطلق ع من يختلف معه ف المعنى معادى لل (الساميه)..ولن اتعجب ان ظهر علينا بعد يومين 

صفحه ع الفيس بوك او هاتش تاج ع تويتر

باسم كلنا مع الساميه

او ماما امريكا

او الحريه لاسرائيل


كل شىء محتمل 

ف ظل


الديمو كتاريه الامريكيه

وعجبى

هى وجهه نظر...تحتمل الخطأ والصواب...فان كانت خطأ..فاعمل ع نسيانها....وان كانت صواب..فالحمد لله ..وحاول ان تعمل بها..اشكركم ع المتابعه..ولقاء يتجدد ان قدر لنا الله ذلك