الثلاثاء، 18 مايو 2010

طب وماله ...قولوا كمان


كلنا بنتعرض للنقد الهدام... يعنى انت متوقع ايه غير كده!! لازم تبقى عارف انك هتقابل ف حياتك حرب من النقد الهدام ومن التحطيم  والاحباط.. طالما انك لامع وظاهر ف مجالك وطالما فيه لسه ناس منفسنه موجوده بيتعبوا من تقدم الاخرين وبالتالى بيعملوا ال يقدروا عليه علشان يثبتوا لنفسهم انهم بخير .. وطبعا مش هيسيبوك الا لو رحلت عنهم انما طول ما انت فوق نفسهم كده يبقى استلم بقى ياعم اساءات وافعال تكاد تبكيك وتقلق منامك..

بس هتعمل ايه ياحلو؟؟!

اقولك انا ..ولا يهمك..

ليه بقى ؟؟!!!  
لانهم  هما اصلا تعبانين منك بدون سبب ..ومن غير ما انت تعمل ليهم حاجه او تغلط فيهم ..تعبانين لانك احسن منهم ومتفوق عليهم سواء بقى ف علم او مال او دين ..طيب السؤال بقى هل هما هيسبوك ف يوم ويرحموك من تصرفاتهم دى؟؟!!         

احب اطمنك ..انسى ياعمرو
طيب وليه تنسى بقى؟؟  
اقولك يا سيدى لانهم مش هيسبوك الا اذا بقيت زيهم..وتخليت  عن الحاجه اللى انت متميز فيها ..يبقى الحل اما انك تعمل زى ماهما عاوزين او انك تبقى زى الصخره و لا تفكر ف اللى بيقولوه واعتبر نقدهم ده واعتراضهم عليك ترجمه على انك كويس وسليم وان بمقدار علمك وتقدمك يزيد النقد المفتعل....ماهو مش معقول يعنى هنقفل افواه الناس..بس نقدر نتجنب كلامهم ..وسيبهم بقى يكلموا نفسهم
ويموتوا من الغيظ وكل ما حبيت تزيد همهم اتقدم اكتر ف مجالك

واعرف ف النهايه ان رضا الناس كلها ..ده هوه المستحيل

4 التعليقات:

غير معرف يقول...

تسلم ايدك يا خالد
وعندك حق فى كل اللى انت
قولتة واكيد انت صح 100%

محمد صالح يقول...

تسلم يا خلود .. وللأمام دايما بأفكارك الجميله وكلماتك المؤثره في الواحد دي

mgardenea يقول...

والله العظيم انت زى ما تكون معايا فى الشغل يا استاذ خالد ده بالضبط اللى حصل معايا وانا فى النهايه هعمل بنصيحتك فعلا لانى جربت كل حاجه ومفيش حاجه نفعت

Unknown يقول...

غير معرف:اشكرك ع الكلام الجميل ده..وكلامى ده من تجارب فعليه .علشان كده واخد معاك نسبه الصحه دى

محمد صالح : تسلم انت ع المرور ويارب دايما اقدر افيدك بالكلام الكويس

mgardenea: نفسى اعرف ايه معنى اسمك..وانا فعلا انصحك انك تعمل زى ما بقولك كده..لانى جربت كل الحلول قبل ما اقول كده لكم

إرسال تعليق