الاثنين، 6 فبراير 2012

عن العصيان المدنى ....اكتب

عن العصيان المدنى ....اكتب


لو الصوره مش واضحه ده اللنك بتاعها 

 لقيتها ع النت
 

سمعت كثير عن العصيان المدنى المطالب به حاليا ف الوسط السياسى

وبعد لما دورت شويه ع المقصود والمغزى..بصراحه عجبتنى الفكره

وان كنت قلق من النتائج 

لان محدش يقدر يتوقع النتايج

كمان بردو قلقنى مدى الاستجابه من الشارع المصرى

كم ستكون الاستجابه

لانه لو كانت اقليه هيا ال هتعمل الاضراب او العصيان المدنى ده..يبقى مش هتأثر 
 
ولا هتجيب نتيجه

انا شوفت تأكيدات من طلبه كتيره وناس كتيره

بس عاوز اوضح حاجه لناس بتقول ان ال بيدعو للعصيان ده هيدمر البلد

اولا البلد  خلينا متفقين اننا قبل الثوره  كان حالنا مش حلو ولا حاجه ..
 
 
 
ده احنا كنا بنستورد الفانوس والكبريت

وبعد الثوره اه ..مبقناش بنعمل صواريخ

بس بردو مش هنموت م الجوع يعنى

فبلاش نغمه خربتوا البلد  والقصص دى

البلد خربانه من 30سنه ومحدش فتح بقوا علشان كان ف غيببوبه 
 
ماسكه ف الشعب ومش راضيه تسيبه

 فمنجيش بقى وقت ما نحب نفوق من الغيبوبه ..نقول هنخرب البلد

البلد خربانه فعليا

احنا بنحاول نطلع من الخراب

كمان ف نقطه ان العصيان ده لكل الناس 
 
ماعدا الناس اصحاب الوظايف الحيويه ...زى الاسعاف والمطافى مثلا 

يعنى اصل شوفت او سمعت مش فاكر فين واحده بتقول اختى عندها عمليه
 
وممكن تكون ف اليوم ده

حضرتك اقرى الاول الدعوه للاعتصام بتقول ايه ..
 
بعدين  اتكلمى 

محدش جاب سيرة الحالات الطارئه والانسانيه

وبعدين حكايه الاضراب والعصيان المدنى دى مش تأليف المصريين ..
 
دى اتعملت قبل كده..او اتهرست ف مليون فيلم قبل كده

معموله لاجبار الحاكم ع ترك السلطه ال لازق فيها

انا مع العصيان للى يقدر يعمل عصيان ..مبقولش حد يضحى بحياة حد..علشان عصيان ..
 
ولكن حاول ع قد ما تقدر تشارك فيه

تخوفى بس من ان كل واحد يطنش وميعملش وف الاخر تبقى فئه بسيطه من الشعب ال عملت ..
 
ووقتها مش هيبقى له لزوم


حد هيقول ليا ان مجلس الشعب هيجيب الحقوق وهيعمل وهيسوى ....هقوله 
 
متقوليش الكلام ده..روح قوله لامهات الناس ال ماتت ..
 
او تعالى اما اقتلك  ابن او اخ..
 
شوف هتصبر ع جرحك ولا هتصرخ بعلو صوتك عاوز حق ابنى

او انزل شوف امهات الشهدا ال قاعدين ف الشارع وعاوزين حق ولادهم

هتقولى ف جلنه

هقولك سلامات يا لجنه

ما ف لجان من 25يناير 2011

ولسه حق الشهدا مجاش

احنا شبعنا مسكنات ...عاوز رد فعلى قوى

عاوزين قرار حاسم

ف ناس تانيه تقول المجلس عمل كتير لينا ...هقوله عمل كتير ..متشكرين ...
 
بس احنا مش عساكر ..احنا عاوزين رئيس مدنى ..
 
لانه ببساطه الرجل العسكرى مش هيقدر يدير البلد

البلد عاوزه قرارت سياسيه ..مش عسكريه

والكلام واضح انتخاب رئيس من المرشحين ف موعد قريب

انا مع العصيان ..
 
لكن 
 
لو المجلس العسكرى وافق ع اقتراح المجلس الاستشارى بفتح باب الترشح

انا مش هعمل عصيان وهبدأ اقرا برامج المرشحين

لانه فتح باب الترشح خطوه ف تسليم السلطه ال لازقه ومتبته
 


 

7 التعليقات:

Tasneem Salah يقول...

تمام وشكله مش هيقبل وشكلنا هنعمل عصيان وربنا يسترها عليكي يا بلد

Unknown يقول...

البوست بتاعك بعد البوست بتاع رضوى أشرف جابلى حالة من الغضب المكبوح غريبة ! :))
أنا كمان مع العصيان المدنى .. الخوف بس من اللى مش فاهمينه صح أو ممكن يطبقوه خطأ
يــــارب يــــــسّر

Unknown يقول...

ان شاء الله خير

راء يقول...

كلنا بنحاول نفهم الناس حاليا العصيان المدني يعني ايه
ربنا هيستر وكله هيبقى كويس ان شاء الله

Unknown يقول...

يارب

rona ali يقول...

انا اللي فاهمته انه خلاص باب الترشح هيبدأ في مارس

بص انا مع العصيان المدنى بس زى ما الصورة بتقول الحالات الضروريه تنزل ليها
اللى زى الدكاترة كدة يكونوا متواجدين دوال ليهم اهميه وانقاذ نفس بشريه

بس علي فكرة يا خالد اليوم دة هيخسر البلد ملايين خاصه المؤسسات الحكوميه يعنى ماما اكيد بموظفين المحكمه مش هيقدروا يعملوا عصيان مدنى لانهم في قسم خاص بدفع رسوم الدعاوى وبيدخل ملايين للحكومه يعنى

ولان كمان دار الافتاء وشيوخ الازهر قالوا انه حرام تخسر البلد كل دة
والدار طلعت قرار ضد العصيان وحرمته علي ماعتقد يعنى واتذكر انى قريت دة :)

Unknown يقول...

بالنسبه للمحكمه

ال مش هيقدر يدفع ف اليوم ده

يبقى يدفع ف يوم تانى

ماهو مش معقول يعنى هياخد القضيه ويروح للنجار ال جمب المحكمه

كده كده هيدفع ف المحكمه

وبعدين خساير البلد هتبقى ايه ؟


هوه احنا يا حسره بننتج حاجه اصلا
:(

عموما ال موافق ويقدر ..ينفذ

وال موافق ومش يقدر ....ينفذ

وال مش موافق عموما....ينفذ

كل واحد ينفذ ال يناسبه
لا اجبار ف شىء اطلاقا
:)

إرسال تعليق