السبت، 11 فبراير 2012

عن يوم جميل ...اكتب

تثاااؤب








احم

الواحد عنده كسل التنين بعد اكله دسمه

مش عارف ايه ده

انتوا طبعا مستنين انى اكتب تدوينه امبارح ..علشان انا كده من المتأخرين 

والمفروض انى اكون دلوقتى بكتب ف التدوينه بتاع النهارده

امممم ..طيب اكتب ايه ...انا احترت ..اكمل كلامى عن الكتاب ولا اشوف حاجه 

تانيه اكتب عنها ولا ايه

اوووووووووووف المدير طلب منى شغل اعمله

استنوى اخلص وارجع تانى

طبعا هيطلع حد يقولى ..ايه ده انت ف الشغل ليه يا باشا مش ف اعتصام واضراب.

هقوله ادينى ودنك يا موعلم :D

 انا مع الاضراب والاعتصام..ونفسى اضر يجى عشر شهور كده..لانى مش باخد 

اجازات ف الشغل ابن التيت ده..وقرفان اخر قرف...بس المشكله انى مكانى ده 

العين عليه كتيره....وكمان مينفعش ما اجيش.
 
فانا مع الاضراب بس للاسف مش عارف اضرب ..:D

نرجع تانى بقى للى كنا فيه ..انا جبت له مبيعات سنه ..اهو يتسلى بيها شويه ...

اكتر حاجه ممكن تضايق  ف الشغل...انه يطلب منك تقرير عن علاقه الهنود الحمر

واكلى لحوم البشر ف القاره السمراء

بالمذئوبين ومصاصى الدماء ف اوروبا الوسطى

وذلك ف الحقبه من 20000سن قاااف ميم ..ال هيا ق .م ..

ال بالعربى يعنى قبل الميلاد
.

مطلوب منى فجأه كده وبدون مقدمات ..تقارير عن مبيعات 4 سنين فاتوااا

ادعك الفانوس انا يعنى ولا ايه

طبعا هتدخل الارشيف بقى وتقعد تجيب يمين وشمال والمزعج اكتر بقى ان التلاجه

  ال هناك دى بنت التيت تبقى فاصله ..وميحلاش ليها تشتغل تانى الا وانت جمبها 

..بصوتها الفظيع ده..فتتخض انت يا ولدى ..والورق يقع منك :D



ما علينا ..

اما الحق اكتب بقى قبل ما السنه ال بعد كده يجى عليها الدور

حدش فاكر انا كنت جاى اكتب ايه ؟

(اموشن واحد بيشد ف شعره )

امم اها كنت هحكى لكم عن يوم الجمعه ..ال هوه امبارح

كنت مجهز نفسى بقى علشان احضر حفله كده كان ف كذا جميعه

عاملينها لاطفال منطقه عندنا اسمها عزبه الشحاتين

انا بصراحه معرفش المنطقه دى فين ...بس  ع حسب ما فهمت انهم ناس ظروفها 

وحشه اوى ...والجمعيه كانت عامله الحفله دى لاطفال المكان ده كنوع من 

الترويح 

عن النفس يعنى ونحسسهم اننا معاهم


عاااااااااااااااااااااااا..استنواا تانى ..

خليكوا فاكرين وقفنا فين ..ع لما اجيب تقرير تانى


ده باينه مرار طافح

هااااه ..اخيرا خلصت ..هقوم اصلى الظهر بقى وارجع :D

يلا بقى اكمل كلامى

بس هوه انا هبقى امتى مدير :D

ما علينا

اليوك كان جميل جدا..وشوفت شويه اطفال زى السكر يعنى حاجه جميله 

اعتقد انه اليوم بغض النظرعن السلبيات ال كانت فيه ..ألا انه كان حلو


ملحوظاتى ع اليوم

1- ان الواحد كان رايح بهدف انه يعطى للناس دى دفعه وامل ف بكره ...

لكن بصراحه هما ال ادونى الدفعه والبسمه كمان  فتقريبا كده ربنا بيكافىء .

او مش فاهم بالظبط الموضوع بيتم ازاى ..

بس تقريبا تعمل الخير وربنا بيعود عليك بالنفع يعنى

2-انا كنت شاكك ان ف م شكله ف ركبتى الشمال من كام سنه كده وكنت مطنش..

وبما ان شغلى كله قاعد ع المكتب..فمش بمشى كتير وكمان مش بمشى ..

ولكن امبارح بقى بما ان الحركه كانت كتيره ..واضح انها بدات تعانى ..

واكتشتف فعلا انها فيها مشكله..وبعلن حملة جمع التبرعات للكشف ع ركبه الاستاذ

ركبه الاستاذ تا تعيش تا تعيش :D

وكفايه رغى بقى وهجبلكوا شويه صور من اليوم نفسه  وما بعد اليوم يعنى

ده انا ..وانا نازل ادلع املى القلل ..قصدى  ع النيل واحنا ف النادى :D



 الاجنبى ده بقى كنت فاكره بنت ..وف اخر الحفله عرفت انه ولد :D




انفخ البلالين يا تاااكاشى علشان عيد الميلاد ..مع الاعتذار للفنانه زكيه زكريا :D


دى ولد كان كارهنى وكارهه الكاميرا...ومامته مصممه انى اصوره ...ومش عاوز يتعدل..بعد كده بتقولى هات الصوره بقى ...تقريبا كانت فاكره اننا ع البحر وانا ال بيصور هناك :D




الراسى المدلع ده بقى لمحته كده ..رحت زووم ان وجايبه ع طوووول ..بيفكرنى بحد عزيز عليا :D


الاروبه دى بقى مبتطلتش رقص ...مشكل مشكله يعنى 




روحت مسكتها وبلاعبها كده وقولت لتاكاشى يصورنى ..بس انا شكلى غريب ف الصوره ..يمكن مكسوف بقى اصلها باستنى فجأه :D



الجميل ده كان بيغنى تقريبا ..زهايمر بقى :D



دول بقى قصتهم قصه..ببص كده لقيت واحده قدامى بجناحات فراشه ..بلاعبها وبهزر معاها ..وبعدين سبتها ببص ف مكان تانى لقيت واحده تانيه ...قولت لا هاتهم بقى ..طلعوا توأم ....فراشتين توأم :D


وانا مروح ..وماشى جمب النوادى ال ف المكان ده..لقيت المنظر ده ..صورته من خارج الاسوار ..اموووت واعرف دخلوا المكان ازاااااااااااااى....ممكن يكون كان واخده ابنه ورايح يفسحه ف ملاهى بيبو دى :D




المركب دى دايما بشوفها ف النيل ..بخطط يا اسرقها ...يا اشتريها ..عجبانى 



دى بقى منظر تانى للمركب


ده كوبرى طلخا..اول مره اشوفه بالشكل ده ..عجبنى بصراحه وخصوصا الانعكاس 





من الغرائب بردو ف الحفله ..انى معرفتش اخد مكان كويس اصور منه ..وكل ما اجى اطلع اتحشر ف وسط المنظمين علشان اعرف اصور زيهم ..ينزلونى 

تقريبا كانت ريحتى وحشه ولا ايه ...D

مع انى مستحمى السنه ال فاتت :D

التدوينه دى اخدت وقت رهيييب ..وكانت مليانه فواصل

مين يفطر بسكويت :D



11 التعليقات:

بنت من مصر يقول...

ههههههههههه
التدوينة دى ماخدتش وقت ولا حاجة
التدورينة دى انا زعلت لما لقيتها خلصت ,
حلوة الفكرة وحلاوتها طالعة من خفة دمها
بجد يا خالد اتبسطت واستمتعت بيها اوى
احم احم
ندخل بئا ف صلب الموضوع
انك تدمج مليون فكرة جوا قالب واحد وتطلع بالمنظر ده
اسمح لى اقولك دى مهارة
ومش بس مهارة
دى كمان حرفنه
انا لا تهت منك ف الكلام ,ولا زهقت ونزلت بالماوس للاخر علشان اشوفها هتخلص امتى ,
ربنا يرضى ليك
ويفرح قلبك الابيض على اد الخير اللى بتعمله
سلام يا اجدع اخ
اسمه غزال
بنت من مصر

Unknown يقول...

اخجلتينى بردك ده بصراحه

ربنا يجزيك خير يا رااافع معنوياااتى

بس دى مش حرفنه ولا حاجه

ده جست عفويه :)

فاطمه غريب يقول...

ههههههههههههههههههههه جميله جدا أسجل أعجابي بيها :) ممتاز ربنا يوفقكـ :)

Unknown يقول...

تسلمى :)

Sea Lover يقول...

واضح إنها أخدت وقت كبيـــر أوى على بال ما اتكتبت :))
ربنا يكون فى عونك

أحلى حاجة فى يومك اللى حكيت عنه إنه كان فيه قيمة جديدة ضيفتها له :)
جزاك الله خيراً

سميحة ميحة يقول...

حبيتها اوي , انت غيرت يومي يا خالد :)
ده بجد

Unknown يقول...

شكرا ايمان

شكرا سميحه

Manar يقول...

I like ur spontaneous soul
u're 100% Gemini
bgd enta t5aly 2y 7ad mahma kan medaye2
eno yd7ak w 8asben 3ano
gamela 2wy ya Khaled
rbna ywfa2ak yaaaaaa rab :D :D :D

Unknown يقول...

ربنا يكرمك يا منار ..دايما رافعه معنوياتى كده :)

zoza يقول...

هههههههههههههه انا حسيت اني كنت معاكم من كلامك الرائع ده
ماشاء الله عليك بجد ف وصف الاشياء والنمط اللي انت ماشي عليه ف كتابات
بس المركبه دي بتاعت لو سمحت :D
انا اللي هشتريها كل مااعد عليها بقي نفسي اعرف ايه جواها ؟:)

Unknown يقول...

اشكرك جدااا

ممكن ابقى اديك حد من ولاد لمركبه
انما المركبه دى تاعتى انا :D

إرسال تعليق