انت بتشجع الاهلى ولا الزمالك ياعم الحاج؟؟

السلام عليكم ورحمة الله وبركاته

ازيكوا يا حلوين ..كبار وصغيرين

النهارده صحيت الصبح ..ودى حاجه غريبه طبعا ان الواحد يصحى الصبح ..بس نعمل ايه بقى ..ظروف الشغل كده..وطبعا ظروف غريبه..ال يعنى مش كل الشعب كده..المهم  لقيت نفسى تعبان وظغطى واطى..فاخدت العلاج..بس بردو كنت دايخ وتعبان زى مانا ..فعملت تليفون اخد اذن ..وكملت نوم.زصحيت ع الضهر..فطار بقى علشان الحق اتغدى..وبعدين قولت اروح بقى احلق شعرى .احسن بدا ينزل ع عنيا..وكان الموقف بتاع موضوع المره دى 

وانا عند الحلاق..طبعا الحلاق  كان واكل ودنى من كتر الكلام عن الماتش وتوقعاتى ايه ..ع اساس انى انا كبير مدربى العالم..فدخل عم عبده

وعم عبده ده راجل فلاح بسيط.من الى بيدخلوا القلب اول ما تشوفهم ..وللعلم للى ميعرفش ..انا عايش ف قريه صغيره جمب المنصوره ..وع قد صغرها كمساحه ع قد كبرها بناسها الطيبين..المهم .انه الحلاق بيقوله بتشجع مين ياعم عبده..فعم عبده قاله ايه؟.؟ بتقول ايه ..طبعا لانه سمعه تقيل شويه ..فالحلاق (صارخا)) بتشجع الاهلى ولا الزمالك؟

فرد عمو عبده  وقاله اه..انا بشجع......البهايم

اه تخيلوا ...عم عبده بيشجع البهايم

بصراحه شدنى افهم منهج عم عبده..فكلمته انا ..وقلت له ..ليه ياعم عبده بتقول كده

قالى عادى يابنى ..كل واحد له هواياته.انت بتحب فريق بتشجعه ..انا بحب  مصدر رزقى فبشجه

فالحلاق قاله ازاى يعنى ..قاله اه بشجعهم علشان ياكلوا .وعلشان يشربوا . حتى لسه مشجعهم  قبل ما اجى دلوقتى.وضحك

الحلاق ضحك  عليه اوى..عم عبده قاله ..بتضحك..طب انا بشجع دول وبكسب من  وراهم ..انت بقى بتشجع ..وبتكسب ايه؟

وبعدين عادى كل واحد يشجع ال يحبه..انا مبشجعش كوره الا لما يكون حد من مصر بيلعب مع فريق اجنبى

 تخيلوا هيا دى رؤيه عم عبده الفلاح البسيط للكوره.ياترى رأيكوا ايه ف رؤيته دى؟؟