الأربعاء، 3 أغسطس، 2011

الليله الكبيره

الليله الكبيره

النهارده زى ما انتوا شايفين

النهارده زى ما انتوا سامعين

النهارده زى ما انتوا حاسيين

يوم مختلف
شعور مختلف
فرحه مختلفه


العادلى ومساعديه
جمال
علاء
حسنى مبارك

ف القفص..فيلم الموسم



مش شماته ...محدش يفهمنى غلط

ومش فرحه ف حد معين او تشفى

لا اطلاقا

لو اليوم مختلف ..فلانه ولاول مره المصريين بيحاسبوا رئيس وعدد كبير من المسؤلين

ما علينا هما مين ..بس ده بيقول ...انا بتنفس حريه


لو شعور مختلف ...ف ده بسبب انه  محلصتلش الحاجه دى قبل كده..وبالتالى شعور بالامان ..انه مفيش ضرب ع القفا تانى

مفيش تعذيب تانى ..مفيش خوف تانى ..مفيش ظلم تانى ...ف عقاب..ف حساب...مفيش كبير وصغير....كله زى بعضه

ومحدش فوق القانون

لو الفرحه مختلفه...فطبعا  لازم تبقى مختلفه.... ..ومحدش يقولى دى شماته...لا....دى فرحه بان كل واحد بياخد حقه

انا مش بطالب بحاجه معينه للناس دى ..ولا بقول اعدام ولا بقول اى حاجه..انا بقول بس يتحاكموا...وانا متأكد ان ربنا مش هيضيع حق الناس ال ماتت ..وحق الشعب ال اتشرد ...وحق الغلابه المطحونين ..وحق وحق ..اقول عن مين ولا مين

حق واحد مات غدر...ولا حد مصاب ..بقى عاجز..ولا حق سجين ..ضاع عمره .. وكل ده علشان قال رأيه ؟

انا مش بطالب بحاجه معينه للناس دى ..بس بطالب بتحقيق العدل

فرحتى مش شماته ف حد ...

فرحتى ان القانون بياخد مجراه

وان الناس كده عرفت انه ف حساب



انا عارف طبعا انه ف القانون الجنائى ف ثغرات يطلع تاجر المخدرات من التهمه ..مع انه ممسوك تلبس

تفتكرواا ممكن الناس دى تطلع من التهم الموجهه بردو؟

ياترى ايه عواقب ده لو حصل؟؟
عموما انا يكفينى انهم يتحاكموا ..ونتيجه المحاكمات متوقفه ع ضمير هيئه المحكمه ..وشطاره المحامين من الطرفين ..وقوه القانون


ومتاكد ان ربنا مش هيضيع حق الغلابه

من قتل يقتل ..ولو بعد حين

انا بتنفس حريه

:)

5 التعليقات:

heba atteya youssef يقول...

انا معاك دي مش شماته

لكن دعوة حوالي 5 مليون مشرد .. حقيقي 5مليون بلا مأوي

وغيرهم من المظلومين ..

من رحمة ربي انه يمهل .. ولا يهمل

تحياتي

خالد ناجى يقول...

اكيد

ربنا موجود

:)

EL pRiNcEssA يقول...

خللي بالك لاني شايفة ان مبارك مبيسمعش اصلا
تقريبا مش هياخد تهمة قتل المتظاهرين دي لانه شكله مكنش واعي ولا موجود ف الصورة من الاول اصلا
بس فيه ناس بتقول ان دي حركات الله اعلم برضه
بس حقيقي انا قلبي وجعني من تبدل حاله وصعب عليا
وكان اول شعور بالنسبالي اني حسيت بقدرة ربنا
حسيت بيها اوي سبحانه الاعظم والاقوي
بس حقيقي بكره العادلي وجمال
الاتنين محتاجين الشنق
بس ده فعلا يطمن ان ممكن الجاي يكون احسن

وائل متولي يقول...

بسم الله الرحمن الرحيم ( قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير انك على كل شئ قدير ) صدق الله العظيم
لم يكن يتوقع احد ابدا ان ترى مثل هؤلاء الظالمين المتحكمين في مقدرات هذا الشعب اعواما طويلة خلف القضبان هنااا فقط يجب ان نتذكر جميعا عظمة خالقنا ورازقنا ونعلم علم اليقين ان من ظلم يقصم ولو بعد حين وسبحان الله يمهل ولا يهمل ومهما كانت نتيجة المحاكمات فلن تقوم لدولة الظلم قائمة بعد اليوم

خالد ناجى يقول...

برنسيس..كل شىء ممكن ف الموضوع ده ..بس هما يستاهلوا ال يجرالهم ..واكيد ربنا مش هسيب حق ال ماتوا ولا ال اتصابوا


وائل باشا..اكيد ربنا المتحكم ف كل هذا..وسبحان الله ..وهما كده بقى عبره لمن يعتبر ..علشان ال يجى بعد كده يبقى عارف انه مممكن ف يوم يبقى ف نفس المكان

إرسال تعليق